बिर्तामोड । सेण्ट जेभियर्स स्कूल देवनियाका पूर्व प्रिन्सिपल फादर म्याथ्यू दासको दुर्घटनामा परी निधन भएकोछ । सिलोङ जानेक्रममा मेघालय नजिक विपरित दिशाबाट आएको मालबाहक ट्रक अनियन्त्रित भई दास सवार बोलेरोलाई ठक्कर दिँदा बोलेरोमा सवार ६ जनाको घटनास्थमै निधन भएको बताइएकोछ ।
निधन हुनेमा फादर दास, अर्का एक शिक्षक, बलेरो चालकसहित अन्य तीनजना सिस्टर (शिक्षिका) रहेको बताइएको छ । फादर दास सेण्ट जोहन्स उच्च माध्यमिक विद्यालय बारामा आसाममा हाल प्रिन्सिपलको रुपमा सेवारत थिए ।
बिर्तामोड ८ मा रहेको सेण्ट जेभियर्स स्कूल देवनियाको स्थापना कालमा जग्गा व्यवस्थापन समितिदेखि नै उक्त विद्यालयलाई सहयोग पुर्याउदै आएका फादर म्याथ्यु केहीवर्ष अघिमात्र आसाम गएका थिए । देवनियामा रहँदा उक्त स्कूलको आमुल परिवर्तन गरी हालको अवस्थामा ल्याई पुर्याउन फादर दासको अतुलनीय योगदान रहेको अभिभावकहरु स्मरण गर्छन् ।
सेण्ट जेभियर्स स्कूल देवनियामा १० जोड दुईको कक्षा संचालनदेखि कार्यक्रम सभाहल निर्माणमा तत्कालिन अभिभावकहरुसँग आर्थिक सहयोग संकलनको अभियानदेखि मेलाको आयोजनासम्म उनै फादर दासको नेतृत्वमा भएको थियो । मिठो बोली, सरल जीवन, सबैसँग सहज घुलमिल गर्ने स्वभावका फादर दास गायन, नृत्य तथा गितार बजाउन पोख्त थिए । जसले गर्दा कार्यक्रमहरुमा अभिभावकहरु उत्तिकै रमाईलो गर्दथे । फादर दासले नेपाली गीतहरुमा पनि स्वर दिएका थिए ।
विद्यार्थीहरुको उन्नतिमा विद्यालय, विद्यार्थी र अभिभावकसँगै हिडेमात्र विद्यार्थीलाई सफल बनाउन सकिन्छ भन्ने सोच राखेका फादर दास नेपाल र नेपालीको उन्नति र प्रगति देख्न चाहने व्यक्तिका रुपमा चिनिन्थे । विद्यार्थीहरुलाई नै छोराछोरी ठान्ने उनको धार्मिक संस्कार अनुसार जीवनभर अविवाहित भएर आफूलाई शैक्षिक सेवामा समर्पित गरेका थिए फादर दासले । ५२ वर्षीय फादर दासको निधनमा सेण्ट जेभियर्स देउनियाले फागुन १५ गते शोक विदा पनि दिएको थियो ।
